गडचिरोली पोलिसांची मोठी कारवाई; नक्षलवाद्यांचा कॅम्प केला उद्ध्वस्त
गडचिरोली: उपविभाग भामरागड अंतर्गत येणाऱ्या पोमके कोठी हद्दीतील छत्तिसगढ़ सीमेलगत असलेल्या अबुजमाड भागातील मौजा कोपर्शी व मौजा फूलनार जंगल परीसरात नक्षलवाद्यांनी मोठा कॅम्प लावला असल्याच्या व घातपाताची मोठी योजना असल्याच्या गोपनिय माहितीच्या आधारे विशेष अभियान पथकाचे जवान रवाना करण्यात आले. सदर परीसरामध्ये कॅम्प उध्वस्त करण्याकरीता गेले असता काल दुपारी ०४.३० ते ०७.०० वाजताच्या दरम्यान कंपनी १० व भामरागड दलमच्या नक्षलवाद्यांनी जवानांना जीवे मारण्याच्या उद्देशाने जवानांच्या दिशेने अंदाधुंद गोळीबार केला.
जवानांनी प्रत्युत्तरादाखल स्वसंरक्षणार्थ गोळीबार केला असता, पहिल्यांदा चकमक घडून आली. त्यावेळी नक्षलवाद्यांनी पळ काढला. त्यानंतर जवानांनी पाठलाग केला असता, पुन्हा नक्षलवाद्यांनी जवानांच्या दिशेने गोळीबार केला तेव्हा दुसऱ्यांदा चकमक घडून आली. तिथुन नक्षल्यांनी पळ काढल्यानंतर जवानांनी पुन्हा नक्षलवाद्यांचा पाठलाग करीत असतांना तिसऱ्यांदा चकमक घडून आली. यावेळी नक्षलवाद्यांनी संधीचा फायदा घेत घटनास्थळावरून पळ काढला. जवानांनी न डगमगता त्यांना प्रत्युत्तरादाखल सडेतोड उत्तर देत नक्षलवाद्यांना सळो की पळो करून सोडले यात जवानांना नक्षलवाद्यांचा मोठा कॅम्प उध्वस्त करण्यात मोठे यश मिळाले.
हेही वाचा: गडचिरोली: पोर्ला मध्ये पती व सासूनेच लावली सुनेला आगचकमकीनंतर सदर जंगल परिसरात जवानांनी शोध अभियान राबविले असता नक्षलवाद्यांचा मोठा कॅम्प असल्याचे दिसून आले. घटनास्थळावरून आयईडी मोठया प्रमाणावर व नक्षल साहित्य हस्तगत करण्यात आले. आयईडी हे अत्यंत सतर्कतेने जागेवरच नष्ट करण्यात आले असून जवानांनी नक्षलविरोधात महत्वपूर्ण कारवाई करत नक्षलवाद्यांची घातपाताची मोठी योजना उधळून लावण्यात यश मिळविले आहे.
"विशेष अभियान पथकाच्या जवानांच्या शौर्यपूर्ण कामगिरीचे पोलीस अधीक्षक अंकित गोयल यांनी कौतुक केले असून, सदर परिसरात नक्षलविरोधी अभियान तीव्र करण्याचे संकेत दिले.
