सावली : सावली तालुक्यातील पाथरी पोलीस स्टेशन हद्दीतील आसोला तलावात मासेमारीसाठी गेलेल्या एका व्यक्तीचा पाण्यात बुडून मृत्यू झाल्याची दुर्दैवी घटना घडली आहे. डोंगा उलटल्यानंतर ही दुर्घटना घडल्याचे समोर आले असून, या घटनेमुळे परिसरात शोककळा पसरली आहे.
मिळालेल्या माहितीनुसार, आसोला चक येथील रहिवासी गुरुदास जयराम मेश्राम (वय ३७) हे २४ जून रोजी सायंकाळच्या सुमारास नेहमीप्रमाणे मासेमारीसाठी आसोला तलावात गेले होते. मासेमारी सुरू असताना अचानक त्यांचा डोंगा असंतुलित होऊन पलटल्याची माहिती समोर आली आहे. त्यामुळे ते थेट पाण्यात पडले आणि खोल पाण्यात बुडाल्याने त्यांचा संपर्क तुटला.
घटनेची माहिती मिळताच पाथरी पोलीस ठाण्याचे अधिकारी आणि कर्मचारी तातडीने घटनास्थळी दाखल झाले. स्थानिक ग्रामस्थांच्या मदतीने तलाव परिसरात शोधमोहीम सुरू करण्यात आली. रात्री उशिरापर्यंत शोधकार्य सुरू ठेवण्यात आले, मात्र अंधार आणि प्रतिकूल परिस्थितीमुळे मोहीम थांबवावी लागली.
दुसऱ्या दिवशी सकाळी पुन्हा पोलीस आणि स्थानिक नागरिकांनी संयुक्तपणे शोधकार्य हाती घेतले. अखेर सकाळी साडेसात वाजण्याच्या सुमारास गुरुदास मेश्राम यांचा मृतदेह तलावातून बाहेर काढण्यात आला. त्यानंतर मृतदेह पुढील वैद्यकीय आणि कायदेशीर प्रक्रियेसाठी मूल येथील उपजिल्हा रुग्णालयात पाठविण्यात आला.
आसोला तलाव परिसरात यापूर्वीही अशा प्रकारच्या काही दुर्घटना घडल्याची नोंद आहे. त्यामुळे मासेमारी करणाऱ्या नागरिकांच्या सुरक्षिततेचा प्रश्न पुन्हा एकदा ऐरणीवर आला आहे. स्थानिकांनी तलाव परिसरात सुरक्षाविषयक उपाययोजना अधिक प्रभावी करण्याची मागणी केली आहे.
गुरुदास मेश्राम यांच्या निधनामुळे त्यांच्या कुटुंबावर मोठे संकट कोसळले आहे. त्यांच्या पश्चात आई, पत्नी, मुलगा आणि मुलगी असा परिवार असून, कुटुंबाचा प्रमुख आधार हरपल्याने गावात हळहळ व्यक्त केली जात आहे. या घटनेमुळे संपूर्ण आसोला परिसर शोकमग्न झाला आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.