News File Photo
गोंदिया : आमगाव रेल्वे स्टेशन परिसरात रेल्वेच्या धडकेत एका अनोळखी तरुणाचा मृत्यू झाल्याची दुर्दैवी घटना गुरुवारी सायंकाळी उघडकीस आली. या घटनेमुळे परिसरात काही काळ खळबळ उडाली असून पोलिसांनी आकस्मिक मृत्यूची नोंद करून पुढील तपास सुरू केला आहे.
माहितीनुसार, गुरुवारी सायंकाळी सुमारे ६.१७ वाजताच्या दरम्यान आमगाव डीएनए स्टेशन परिसरातील डाऊन लाईनवर पोल क्रमांक २७४/३६ ते २७४/३४ दरम्यान एका तरुणाचा मृतदेह रेल्वे रुळांजवळ आढळून आला. स्थानिक नागरिकांच्या निदर्शनास ही बाब येताच तातडीने पोलिसांना माहिती देण्यात आली.
Read Also: सिंदेवाही हादरले! तेंदूपत्ता तोडायला गेलेल्या चार महिलांना वाघाने केले ठार
घटनेची माहिती मिळताच आमगाव पोलीस घटनास्थळी दाखल झाले. पोलिसांनी परिसराची पाहणी करून मृतदेह ताब्यात घेतला. प्राथमिक माहितीनुसार, मृत तरुणाचे वय अंदाजे ३९ वर्षे असल्याचे सांगितले जात आहे. मात्र, त्याची ओळख अद्याप पटलेली नसल्याने पोलिसांकडून ओळख पटविण्याचे प्रयत्न सुरू आहेत.
या प्रकरणी संतोष भोजराज भांडारकर (वय २६, रा. पदमपूर) यांनी दिलेल्या माहितीवरून आमगाव पोलिसांनी आकस्मिक मृत्यूची नोंद केली आहे. मृतदेह शवविच्छेदनासाठी पाठविण्यात आला असून रेल्वेच्या धडकेत मृत्यू झाला की अन्य काही कारण आहे, याचा तपासही सुरू करण्यात आला आहे.
दरम्यान, रेल्वे मार्गावर वारंवार घडणाऱ्या अशा घटनांमुळे सुरक्षेचा प्रश्न पुन्हा एकदा ऐरणीवर आला आहे. पोलिसांकडून परिसरातील सीसीटीव्ही फुटेज, रेल्वे प्रशासनाची माहिती आणि इतर तांत्रिक बाबींची तपासणी केली जात आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.