गडचिरोली : एसटी महामंडळाच्या बसचा गुरुवारी सकाळी गडचिरोली-चंद्रपूर मार्गावर भीषण अपघात झाला. नवेगाव-मुरखळा गावाजवळील धोकादायक वळणावर बस अनियंत्रित झाल्याने हा अपघात घडला. या दुर्घटनेत तीन जणांचा दुर्दैवी मृत्यू झाला असून ३० हून अधिक प्रवासी जखमी झाले आहेत.
अपघातात सात वर्षीय शिवांश स्वप्नील नवघरे, ख्वाजा शाहबुद्दीन (६०) आणि लक्ष्मीबाई दुरकीवार (५५) यांचा मृत्यू झाला. या घटनेमुळे परिसरात हळहळ व्यक्त केली जात आहे.
जखमींमध्ये बस चालक रोहित देशमुख (अकोला), वाहक संदीप प्रल्हाद पवार, श्वेता स्वप्नील नवघरे, डॉ. गणेश जैन (गडचिरोली), तसेच यवतमाळ जिल्ह्यातील वणी येथील अनेक प्रवाशांचा समावेश आहे. त्यामध्ये ऋषभ खडके, सचिन वाळके, जयश्री वरभे, सचिन वरदे, जयश्री खाणके, रत्नाकर राऊत, पार्थ राऊत, मंगला कळसकर, भूषण दुरकीवार, विकी सुरेश शेंडे, तारा साबळे, श्रीहरी खळकर, बेबीबाई खळकर, चैतन्य मेडीवर, तानिया मेडीवर, वैशाली माडेवार, रूपाली खणके, ललिता खणके, धनश्री चांदेकर, आशिष साखरकर, मायाबाई कांबळे, संगीता कांबळे आणि ज्योती पाल यांचा समावेश आहे.
याशिवाय व्यंकट ढगे, सुमन कत्तलवार, गौरव कुमरे, अश्विनी तोरपे यांच्यासह अन्य काही प्रवासी देखील जखमी झाले आहेत. सर्व जखमींवर विविध रुग्णालयांमध्ये उपचार सुरू आहेत.
अपघाताची माहिती मिळताच पोलीस, स्थानिक नागरिक आणि बचाव पथक घटनास्थळी दाखल झाले. जखमींना तत्काळ बसमधून बाहेर काढून रुग्णालयात हलविण्यात आले. अपघाताचे नेमके कारण अद्याप स्पष्ट झाले नसून पोलिसांकडून पुढील तपास सुरू आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.