गर्भवती महिलेला पुरातून सुरक्षित बाहेर काढले
गडचिरोली : भामरागड तालुक्यातील हिंदेवाडा येथील गर्भवती महिला अर्चना विकास तिम्मा हिला बुधवारी (दि. २७ ऑगस्ट) पहाटे ४ वाजता राज्य आपत्ती प्रतिसाद दलाच्या (एसडीआरएफ) पथकाच्या मदतीने पामूलगौतम नदीच्या पुरातून सुरक्षितपणे बाहेर काढण्यात आले. तिला नदी पार करून तातडीने भामरागड ग्रामीण रुग्णालयात दाखल करण्यात आले. तेथे सकाळीच तिने गोंडस कन्येला जन्म दिला.
छत्तीसगड राज्यातील मुसळधार पावसामुळे इंद्रावती नदीची पातळी वाढली होती. संभाव्य परिस्थिती लक्षात घेऊन जिल्हा प्रशासन सतत लक्ष ठेवून होते. जिल्हाधिकारी अविश्यांत पंडा यांच्या निर्देशानुसार मंगळवारी रात्री ११ वाजता सिरोंचा येथून एसडीआरएफ पथक भामरागड येथे रवाना करण्यात आले. या वेगवान कारवाईमुळे गर्भवती महिलेला वेळेत रुग्णालयात पोहोचविणे शक्य झाल्याचे तहसीलदार किशोर बागडे यांनी सांगितले.
दरम्यान, भामरागडच्या मुख्य बाजारपेठेत पर्लकोटा नदीचे पाणी शिरले असून ३० ते ३५ दुकानांत पाणी साचले आहे. मात्र, व्यापाऱ्यांनी प्रशासनाच्या सूचनेनुसार आपले साहित्य आधीच हलविल्याने मोठे नुकसान टळले. जिल्ह्यात पावसाचा जोर कायम असल्याने जिल्हाधिकारी यांनी सर्व विभागांना सज्ज राहण्याच्या सूचना दिल्या आहेत.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.