भंडारा: गोसीखुर्द राष्ट्रीय सिंचन प्रकल्पातील पाणीसाठा सध्या 32.42 टक्के इतका नोंदविण्यात आला आहे. उपलब्ध माहितीनुसार, धरणातील जलसाठा नियंत्रित पातळीवर असून पाण्याचे योग्य नियोजन करण्यात येत आहे. सध्या धरणाचे 33 पैकी 33 गेट पूर्णपणे बंद ठेवण्यात आले आहेत. त्यामुळे धरणाच्या गेटमधून कोणताही थेट विसर्ग केला जात नसल्याचे स्पष्ट झाले आहे.
मात्र, गोसीखुर्द जलविद्युत (पॉवर हाऊस) केंद्रामार्फत 180 क्युमेक्स (सुमारे 6,357 क्युसेक्स) वेगाने पाण्याचा विसर्ग सुरू आहे. हा विसर्ग नियमित कार्यपद्धतीनुसार करण्यात येत असून त्यावर संबंधित विभागाकडून सातत्याने देखरेख ठेवली जात आहे.
पाणीसाठा, विसर्ग आणि हवामानातील बदल लक्षात घेऊन सिंचन विभाग परिस्थितीवर बारकाईने लक्ष ठेवून आहे. भविष्यात पर्जन्यमानात वाढ झाल्यास धरणाच्या संचालनाबाबत आवश्यक निर्णय परिस्थितीनुसार घेतले जातील.
नदीकाठच्या नागरिकांनी अफवांवर विश्वास न ठेवता प्रशासन आणि सिंचन विभागाकडून वेळोवेळी जारी करण्यात येणाऱ्या अधिकृत सूचनांचे पालन करावे, असे आवाहन करण्यात आले आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.