चंद्रपूर : ताडोबा-अंधारी व्याघ्र प्रकल्पाच्या बफर क्षेत्रालगत असलेल्या चोरगाव परिसरात वाघाच्या हल्ल्यात एका तरुण शेतकऱ्याचा दुर्दैवी मृत्यू झाल्याची घटना समोर आली आहे. या घटनेमुळे परिसरात भीतीचे वातावरण निर्माण झाले असून, जंगलालगत शेती करणाऱ्या शेतकऱ्यांच्या सुरक्षेचा प्रश्न पुन्हा एकदा ऐरणीवर आला आहे.
मृत शेतकऱ्याची ओळख संजय माधवराव सिडाम अशी झाली असून, ते राजुरा तालुक्यातील केळझर गावचे रहिवासी होते. सध्या ते चोरगाव येथे आपल्या सासऱ्यांच्या शेताची देखभाल करण्यासाठी आले होते. शेतीची कामे सुरू असल्याने ते काही दिवसांपासून चोरगाव परिसरात वास्तव्यास होते.
मिळालेल्या माहितीनुसार, काही दिवसांपूर्वीच संजय सिडाम यांनी आपल्या शेतात मोठ्या आशेने कपाशीची लागवड केली होती. पिकांचे रानडुक्कर, निलगाय आणि इतर वन्यप्राण्यांपासून संरक्षण व्हावे यासाठी ते शेताभोवती सौरऊर्जेवर चालणारे बॅटरी कुंपण उभारण्याचे काम करत होते. दुपारच्या सुमारास ते शेतात एकटेच काम करत असताना शेजारील दाट झुडपांमध्ये दबा धरून बसलेल्या वाघाने अचानक त्यांच्यावर हल्ला चढवला.
अचानक झालेल्या या हल्ल्यामुळे संजय यांना स्वतःचा बचाव करण्याची किंवा मदतीसाठी आवाज देण्याचीही संधी मिळाली नाही. वाघाच्या हल्ल्यात त्यांचा घटनास्थळीच मृत्यू झाला. बराच वेळ ते घरी न परतल्याने नातेवाईक आणि ग्रामस्थांनी त्यांचा शोध सुरू केला. शेतात पोहोचल्यावर त्यांना रक्ताच्या थारोळ्यात मृतावस्थेत पाहून सर्वांनाच धक्का बसला.
Read Also: समृद्धी महामार्गावर काळाचा घाला; चंद्रपूरच्या एकाच कुटुंबातील ५ जणांचा मृत्यू
घटनेची माहिती मिळताच वन विभागाचे अधिकारी, स्थानिक पोलीस आणि बचाव पथक घटनास्थळी दाखल झाले. त्यांनी परिसराची पाहणी करून पंचनामा केला तसेच मृतदेह ताब्यात घेऊन शवविच्छेदनासाठी पाठविण्याची प्रक्रिया सुरू केली. हल्ला करणाऱ्या वाघाचा माग काढण्यासाठी वन विभागाने परिसरात गस्त वाढवली असून कॅमेरा ट्रॅप आणि इतर तांत्रिक साधनांच्या मदतीने हालचालींवर लक्ष ठेवले जात आहे.
ताडोबाच्या बफर क्षेत्रालगतच्या गावांमध्ये मानव-वन्यजीव संघर्षाच्या घटना सातत्याने घडत असल्याने स्थानिक शेतकऱ्यांमध्ये मोठी भीती निर्माण झाली आहे. शेतीची कामे, जनावरे चारणे आणि दैनंदिन हालचाली करताना ग्रामस्थांना जीव मुठीत धरून वावरावे लागत असल्याची भावना नागरिकांनी व्यक्त केली आहे.
Read Also: शेतात काम करणाऱ्या महिला शेतकऱ्यावर कोसळली वीज!
अवघ्या काही दिवसांपूर्वी आशेने पेरलेले कपाशीचे पीक आणि त्याच शेतात झालेला तरुण शेतकऱ्याचा मृत्यू ही घटना संपूर्ण परिसराला हादरवून सोडणारी ठरली आहे. संजय सिडाम यांच्या निधनामुळे त्यांच्या कुटुंबावर दुःखाचा डोंगर कोसळला असून गावात शोककळा पसरली आहे. ग्रामस्थांनी मृताच्या कुटुंबाला तातडीची आर्थिक मदत देण्याबरोबरच वाघाच्या वाढत्या हालचालींवर नियंत्रण ठेवण्यासाठी प्रभावी उपाययोजना करण्याची मागणी प्रशासनाकडे केली आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.