भामरागडमध्ये नात्याला काळिमा; काकाकडून १३ वर्षीय मुलीवर तीन वर्षे अत्याचार | Batmi Express

भामरागड : तालुक्यातील येवली परिसरात नात्याला काळिमा फासणारी धक्कादायक घटना समोर आली आहे. एका १३ वर्षीय अल्पवयीन मुलीवर तिच्याच नात्यातील काकाने तब्बल तीन वर्षे वारंवार अत्याचार केल्याचा गंभीर आरोप समोर आला असून या प्रकरणी मन्नेराजाराम पोलीस ठाण्यात गुन्हा नोंदविण्यात आला आहे.

पोलिसांकडून मिळालेल्या माहितीनुसार, पीडित मुलगी भामरागड तालुक्यातील रहिवासी असून ती शिक्षण घेत आहे. आरोपी दुर्गे (अंदाजे वय ४८ वर्षे) हा पीडितेचा नात्याने काका लागतो. त्याने गेल्या तीन वर्षांपासून मुलीवर वारंवार अत्याचार केल्याचे तक्रारीत नमूद करण्यात आले आहे. तसेच हा प्रकार कुणाला सांगितल्यास जीवे मारण्याची धमकीही दिल्याचा आरोप करण्यात आला आहे.

दरम्यान, पीडित मुलीने आईसोबत मन्नेराजाराम पोलीस ठाण्यात जाऊन तक्रार दिल्यानंतर संपूर्ण प्रकार उघडकीस आला. तक्रारीच्या आधारे पोलिसांनी भारतीय न्याय संहिता कलम ६४(२), ६५(१), ३५१(२)(३) तसेच पोक्सो कायद्याच्या कलम ४ व ६ अंतर्गत गुन्हा दाखल केला आहे.

या प्रकरणाचा पुढील तपास पोलीस उपनिरीक्षक शुभम बी. शिंदे यांच्याकडे सोपविण्यात आला आहे.