आरमोरी (गडचिरोली) : रंगपंचमीच्या उत्सवाच्या दिवशीच एका २६ वर्षीय तरुणाचा वैनगंगा नदीत बुडून मृत्यू झाल्याची दुर्दैवी घटना मंगळवार, ३ मार्च रोजी दुपारी सुमारे १२ वाजता घडली. ही घटना आरमोरी–गांगलवाडी टी-पॉईंट जवळील वैनगंगा नदी घाटावर घडली.
मृत तरुणाचे नाव शुभम रामटेके (वय २६, रा. गायकवाड चौक, आरमोरी, जि. गडचिरोली) असे आहे.
मिळालेल्या माहितीनुसार, रंगपंचमी निमित्त सकाळी सर्वत्र उत्साहाचे वातावरण होते. शुभमनेही मित्रांसोबत रंगोत्सव साजरा केल्यानंतर नदी घाटावर आंघोळीसाठी जाण्याचा निर्णय घेतला. आंघोळ करताना तो नकळत खोल पाण्यात गेला. पाण्याची खोली आणि प्रवाहाचा अंदाज न आल्याने तो बुडू लागला. मित्रांनी तात्काळ मदतीसाठी आरडाओरड केली; मात्र तोपर्यंत परिस्थिती हाताबाहेर गेली होती.
घटनेची माहिती मिळताच आरमोरी पोलिसांनी घटनास्थळी धाव घेतली. स्थानिकांच्या मदतीने मृतदेह बाहेर काढून उत्तरीय तपासणीसाठी रुग्णालयात पाठवण्यात आला. या प्रकरणाचा पुढील तपास आरमोरी पोलीस करत आहेत.
उत्सवाच्या आनंदात घडलेल्या या दुःखद घटनेमुळे रामटेके कुटुंबियांवर शोककळा पसरली असून शहरात हळहळ व्यक्त केली जात आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.