सिंदेवाही | चंद्रपूर न्यूज: सिंदेवाही पोलिस ठाण्याच्या हद्दीतल्या पेटगाव येथे किरकोळ कौटुंबिक वादातून वडील आणि मोठ्या भावाने लहान भावावर जीवघेणा हल्ला केल्याची गंभीर घटना शनिवारी रात्री साधारण ८.३० च्या सुमारास घडली.
प्राप्त माहितीनुसार, जीवनदास रामचंद्र शेरकुरे (३०) आणि त्यांचे वडील रामचंद्र शेरकुरे (६०) यांनी घरातील वाद वाढल्याने प्रणय उर्फ मंगल रामचंद्र शेरकुरे (२५) याच्यावर काठी आणि कव्हेलूने प्रहार केले.
घटनेच्या आधी स्वयंपाकघरात किरकोळ कारणावरून वाद निर्माण झाला होता. आईने मटकीची उसळ बनवली होती; मात्र प्रणयने ती नाकारत दुसरी भाजी करण्यास सांगितले. त्यावेळी टोमॅटोची चटणी बनविताना पुन्हा ताण वाढून वाद गंभीर वळणाला गेल्याचं तक्रारीत नमूद आहे.
प्रणय दारूच्या नशेत वारंवार पालकांशी वाद घालत असे, असेही कुटुंबीयांनी सांगितले. या सततच्या त्रासामुळे चिडून वडील आणि मोठ्या भावाने संतापाच्या भरात त्याच्यावर हल्ला केला. डोक्यावर झालेल्या जबर मारहाणीमुळे प्रणय गंभीर जखमी झाला.
जखमीला तात्काळ ग्रामीण रुग्णालय, सिंदेवाही येथे हलवण्यात आले. मात्र स्थिती गंभीर असल्याने पुढील उपचारांसाठी त्याला चंद्रपूर येथील रुग्णालयात दाखल करण्यात आले.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.