देसाईगंजमध्ये रेल्वे गाडीच्या धडकेत सफाई कामगार ठार
देसाईगंज (गडचिरोली) : देसाईगंज शहरापासून अवघ्या काहीशे मीटर अंतरावर असलेल्या रेल्वे पटरीजवळ आज, मंगळवार २५ नोव्हेंबर रोजी दुपारी दीड वाजण्याच्या सुमारास झालेल्या दुर्दैवी अपघातात ३८ वर्षीय इसमाचा जागीच मृत्यू झाला. शहरातील चुना भट्टी परिसरातील रेल्वे क्रॉसिंग ओलांडताना हा अपघात घडला. मृत व्यक्तीची ओळख रोशन सहारे (रा. रावनवाडी - बोळधा-कोरेगाव, जि. गडचिरोली) अशी करण्यात आली आहे. रोशन हे मूकबधिर असून देसाईगंज नगरपरिषदेत ते सफाई कामगार म्हणून कार्यरत होते.
◼ अपघात कसा झाला?
अपघाताच्या वेळी रोशन सहारे हे आपल्या सायकलीवरून चुना भट्टीजवळील रेल्वे पटरी ओलांडून गांधी वॉर्ड परिसरात जाण्याच्या तयारीत असतांनाच चंद्रपूरहून वेगाने येत असलेल्या कोरबा एक्स्प्रेसने त्यांच्या सायकलला जोरदारधडक दिली. धडकेची तीव्रता इतकी होती की रोशन यांचे संतुलन सुटले आणि खाली पडताना त्यांच्या डोक्याला डोक्याला जबर मार लागून खाली कोसळताच रोशनचा जागीच मृत्यू झाला.
◼ नागरिकांची धावपळ, पोलिसांना माहिती
अपघातानंतर परिसरातील नागरिकांनी तत्काळ घटनास्थळाकडे धाव घेतली. त्यांनी घटनेची माहिती रेल्वे प्रशासन आणि देसाईगंज पोलिसांना दिली. काही क्षणांतच पोलीस पथकाने घटनास्थळी पोहोचून पंचनामा प्रक्रिया सुरू केली. अपघाताची बातमी पसरताच रेल्वे ट्रॅकवर बघ्यांची मोठी गर्दी जमली होती.
◼ पुढील कार्यवाही सुरू
पोलिसांनी मृतदेह ताब्यात घेऊन तो शवविच्छेदनासाठी पाठविण्याची तयारी सुरू केली आहे. या अपघातासंदर्भात आवश्यक तपासाची प्रक्रिया सुरू असल्याची माहितीही पोलिसांकडून देण्यात आली.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.