गडचिरोली : बारावीपाठोपाठ दहावीच्या परीक्षेत यंदाही मुलांच्या तुलनेत मुलीच सरस ठरल्या. महाराष्ट्र राज्य माध्यमिक व उच्च माध्यमिक शिक्षण मंडळाने दहावी परीक्षेचा निकाल २७ मे संकेतस्थळावर दुपारी १ वाजता ऑनलाईन जाहीर केला.
जिल्ह्याचा एकूण निकाल ९४.६७% इतका लागला असून यंदा गतवर्षीच्या तुलनेत टक्का वाढूनही नागपूर विभागात मात्र चौथ्या स्थानी घसरण झाली आहे.
महाराष्ट्र राज्य माध्यमिक व उच्च माध्यमिक शिक्षण मंडळाने मार्च २०२४ मध्ये दहावीची परीक्षा घेतली होती. जिल्ह्यातून १४ हजार ३०५ विद्यार्थी (मुले ७ हजार ३९७ व मुली ६ हजार ९०८ प्रविष्ठ होते. यापैकी प्रत्यक्षात ७ हजार २०४८ मुले व ६ हजार ७७७ मुली अशा एकूण १४ हजार २५ जणांनी परीक्षा दिली होती. यातील १३ हजार २७८ विद्यार्थी उत्तीर्ण झाले. यात ६ हजार ७३३ मुले व ६ हजार ५४५ मुलींचा समावेश आहे.
मुलांच्या उत्तीर्णतेचा टक्का ९२.८९ तर मुलींचा ९६.५७ इतका आहे. गतवर्षी जिल्ह्याचा निकाल सरासरी ९२.५२% इतका होता. टक्का कमी असतानाही गडचिरोली जिल्ह्याने विभागात तृतीय स्थान पटकावले होते. यंदा जिल्ह्याने सरासरी ९४.६७% गुण मिळवूनही विभागात चौथ्या स्थानी घसरण झाली.
वर्षनिहाय निकाल -
- २०२२ ९५.६२
- २०२३ ९२.५२
- २०२४ ९४.६७
नागपूर विभागात रिपीटरच्या उत्तीर्णतेत गडचिरोली जिल्ह्याने द्वितीय क्रमांक पटकावला आहे.