धानोरा, (ता.प्र.): बैलगाडी ही रस्त्याच्या कडेला ठेवली होती पण अचानक दुचाकीने बैलगाडीला जोरदार धडक दिल्याने झालेल्या अपघातात दुचाकीवरील एक तरुण जागीच ठार तर दुसरा गंभीर जखमी झाला. ही घटना तालुक्यातील रांगी येथे बुधवारी सकाळी 10.30 वाजताच्या सुमारास घडली. खट्या बोरुले (35) रा. मानापूर असे मृतकाचे तर राजू ठाकरे असे जखमी इसमाचे नाव आहे.
एम.एच. 33 ए.एफ. 7338 क्रमांकाच्या दुचाकीने खट्या बोरुले व राजू ठाकरे बायपास मार्गाने प्राथमिक आरोग्यकेंद्राकडून मानापूरला जात होते. दरम्यान, रांगी येथील संदीप ताडाम यांच्या घरासमोर दुचाकीवरील नियंत्रण सुटल्याने भरधाव वेगात असलेल्या दुचाकीची रस्त्याच्या कडेला असलेल्या रिकामी बैलगाडीला जोरदार धडक बसली.
यात वाहन चालक खट्या बोरुले जागीच ठार झाला तर राजू ठाकरे गंभीर जखमी झाला. गंभीर जखमीला तत्काळ रांगी प्राथमिक आरोग्य केंद्रात प्राथमिक उपचार करून गडचिरोली जिल्हा सामान्य रुग्णालयात हलविण्यात आले.