गडचिरोली : जिच्यावर जीव ओवाळून टाकला, गुलाबी स्वप्न पाहिले तिने ऐनवेळी लग्नास नकार देत पोलिस ठाणे गाठले. त्यामुळे संतापलेल्या प्रियकराने गळफास घेऊन आत्महत्या केली. सदर घटना १८ जून रोजी रात्री १० वाजता घोट (ता. चामोर्शी) येथे घडली.
माहितीनुसार गणेश अशोक कागदेलवार (२२) रा. घोट असे आत्महत्या केलेल्या युवकाचे नाव आहे. त्याने बीए पदवी मिळवली होती. मिळेल ते काम करून तो घरी हातभार लावत असे. त्याचे गावातीलच एक युवतीशी सहा महिन्यांपासून प्रेमसंबंध होते, त्या दोघांच्या भेटीगाठी वाढल्या. त्याने तिच्यासोबत संसार थाटण्याचे ठरवले. मात्र, प्रेयसीने लग्नास नकार दिला. एवढ्यावरच ती थांबली नाही तर लग्नासाठी तगादा लावल्याने गणेश कागदेलवार विरोधात तिने घोट पोलिस मदत केंद्रातही धाव घेतली. १८ जून रोजी पोलिसांनी दोघांनाही समोरासमोर बोलावल्यानंतर तिने तक्रार मागे घेतली. त्यानंतर दोघेही आपापल्या घरी गेले. दरम्यान, प्रेयसीने लग्नास नकार देत पोलिस ठाण्यात तक्रार केल्याचा वार गणेश कागदेलवार याच्या जिव्हारी लागला. त्याने रागाच्या भरात घरी लोखंडी आडूला साडीने गळफास घेऊन आत्महत्या केली.
सदर घटनेचा तपास घोट मदत केंद्राचे प्रभारी अधिकारी संदीप रोंढे यांच्या मार्गदर्शनाखाली हवालदार मुरारी गेडाम करीत आहेत.
आईचा आधार हरवला -
मृत गणेश कागदेलवार याला वडील नाहीत. तो एकुलता एक होता. प्रेमप्रकरणातून आत्महत्या केल्याने आईचा एकमेव आधार हरवला आहे. त्याच्या आत्महत्येनंतर आईने एकच आक्रोश केला. त्याच्या आईचा आक्रोश मन हेलावणारा होता.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.