आरमोरी : तालुक्यातील सालमारा ते कनेरी मार्गावर सायकलने जात असताना अचानक समोर वाघ आला. त्यामुळे सायकलने जाणाऱ्या वृद्धाची एकच भंबेरी उडाली. वाघ समोर दिसताच साक्षात मृत्यूचे दर्शन झाल्याचा अनुभव त्या वृद्धाला आला. सालमारा येथील मुखरु कुमरे (७०) हे मंगळवारला दुपारी १२ वाजता दरम्यान सालमारा ते कनेरी रस्त्यावरुन सायकलने आधार कार्ड अद्ययावत करण्यासाठी आरमोरीला जात होते. त्याचवेळी वन तलावाजवळच्या रस्त्यावर अचानक त्यांच्या सायकलपढे पट्टेदार वाघ अवतरला. त्यामुळे कुमरे यांची चांगलीच भंबेरी उडाली. त्यांनी कशीबशी सायकल थांबवत मोहफुलाच्या झाडाजवळ सायकल फेकून दिली.
स्वतः झाडाच्या बुंध्याच्या आश्रयाने उभे राहिले. वाघ आणि त्यांच्यात अवघ्या १५ फुटांचे अंतर होते. ते एकमेकांकडे ५ ते १० मिनीटे बघत राहिले. आता आपला मृत्यू अटळ आहे, असे कुमरे यांना वाटत असतानाच वाघ हळूहळू तेथून निघून गेला. यामुळे काळ आला होता पण वेळ आली नव्हती या म्हणीचा प्रत्यय कुमरे यांना आला.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.