ब्रम्हपुरी : शहरालगतच्या पारडगाव परिसरात गुरुवारी पहाटे घडलेल्या भीषण अपघातात गिट्टी वाहतूक करणाऱ्या हायवा ट्रकचा नाल्यात पडून चालक आणि क्लिनरचा जागीच मृत्यू झाला. या दुर्घटनेमुळे परिसरात शोककळा पसरली असून, अपघाताची तीव्रता इतकी भीषण होती की ट्रकच्या पुढील केबिनचा पूर्णपणे चुराडा झाला.
मिळालेल्या माहितीनुसार, एमएच-४० सीडी-९००२ क्रमांकाचा हायवा ट्रक गिट्टी घेऊन आपल्या मार्गाने जात होता. पहाटेच्या सुमारास पारडगावजवळील निलगिरी बारसमोरील वळणाजवळ चालकाचे वाहनावरील नियंत्रण सुटल्याने ट्रक थेट रस्त्यालगतच्या खोल नाल्यात जाऊन कोसळला. प्राथमिक तपासात चालकाला डुलकी लागल्यामुळे हा अपघात घडल्याची शक्यता व्यक्त केली जात आहे.
ट्रकमध्ये मोठ्या प्रमाणात गिट्टी भरलेली असल्याने वाहनाचा वेग आणि वजन दोन्ही जास्त होते. त्यामुळे नाल्यात कोसळल्यानंतर हायवाच्या पुढील भागाचे मोठे नुकसान झाले. केबिन पूर्णपणे दबली गेल्याने चालक आणि क्लिनर यांना बाहेर पडण्याची कोणतीही संधी मिळाली नाही.
या अपघातात चालक सुरेश आनंदराव भुरले (वय ३३, रा. मांडळ, ता. लाखांदूर, जि. भंडारा) आणि क्लिनर अमित देवराव कुमरे (वय २९, रा. इरवा, ता. चिमूर, जि. चंद्रपूर) यांचा जागीच मृत्यू झाला. दोघेही वाहनाच्या केबिनमध्ये अडकून पडले होते.
घटनेची माहिती मिळताच ब्रम्हपुरी पोलीस, स्थानिक प्रशासन आणि नागरिक घटनास्थळी दाखल झाले. अपघातग्रस्त वाहनाची अवस्था पाहता बचावकार्य अत्यंत कठीण ठरले. अनेक तासांच्या प्रयत्नांनंतर यंत्रसामग्रीच्या मदतीने केबिनचा काही भाग कापून दोन्ही मृतदेह बाहेर काढण्यात आले.
त्यानंतर पोलिसांनी घटनास्थळाचा पंचनामा करून मृतदेह शवविच्छेदनासाठी ग्रामीण रुग्णालयात पाठवले. अपघातग्रस्त हायवा नाल्यातून बाहेर काढण्याचे कामही सुरू करण्यात आले. या घटनेमुळे काही काळ वाहतुकीवर परिणाम झाला होता.
दरम्यान, ऐन तरुण वयात दोन जणांचा दुर्दैवी मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. पारडगाव आणि ब्रम्हपुरी परिसरातही या घटनेबद्दल हळहळ व्यक्त केली जात असून, पहाटेच्या प्रवासादरम्यान वाहनचालकांनी अधिक सतर्कता बाळगण्याची गरज पुन्हा अधोरेखित झाली आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.