चंद्रपूर : जिवती तालुक्यातील दुर्गम घोडणकप्पी गावात घडलेल्या एका दुर्दैवी घटनेने ग्रामीण भागातील आरोग्य सेवा आणि पायाभूत सुविधांबाबत गंभीर प्रश्न निर्माण केले आहेत. वेळेत वैद्यकीय उपचार मिळू न शकल्याने २५ वर्षीय गर्भवती महिलेचा प्रसूतीनंतर मृत्यू झाला. या घटनेमुळे नवजात बालिका जन्मताच आईच्या मायेपासून वंचित झाली असून संपूर्ण परिसरात शोककळा पसरली आहे.
माहितीनुसार, घोडणकप्पी येथील संगीता गेडाम यांना रविवारी पहाटे प्रसूती वेदना सुरू झाल्यानंतर कुटुंबीयांनी त्यांना तातडीने रुग्णालयात नेण्याचा प्रयत्न केला. मात्र गावाकडे जाणारा रस्ता अत्यंत खराब अवस्थेत असल्याने शासकीय रुग्णवाहिका थेट गावात पोहोचू शकली नाही. त्यामुळे वैद्यकीय मदतीत मोठा विलंब झाला.
परिस्थितीचे गांभीर्य लक्षात घेऊन गावातील महिलांनी पुढाकार घेत संगीता यांना मुख्य रस्त्यापर्यंत पोहोचवण्याचा प्रयत्न केला. मात्र प्रसूती वेदना वाढल्याने त्यांना पुन्हा घरी आणावे लागले. अखेर घरातच त्यांची प्रसूती झाली आणि त्यांनी एका मुलीला जन्म दिला.
प्रसूतीनंतर काही वेळातच त्यांना तीव्र रक्तस्राव सुरू झाला. प्रकृती चिंताजनक होत असल्याची माहिती मिळताच आरोग्य विभागाचे कर्मचारी गावात दाखल झाले आणि प्राथमिक उपचार सुरू केले. त्यानंतर त्यांना खासगी वाहनाच्या मदतीने शंकरपठार येथे उभ्या असलेल्या रुग्णवाहिकेपर्यंत नेण्यात आले. पुढील उपचारासाठी रुग्णालयात हलविण्याची तयारी सुरू असतानाच त्यांची प्रकृती अधिक खालावली.
दुर्दैवाने, उपचारासाठी रुग्णालयात पोहोचण्यापूर्वीच संगीता गेडाम यांचा मृत्यू झाला. या घटनेमुळे कुटुंबावर दुःखाचा डोंगर कोसळला आहे. एका बाजूला नवजात मुलीच्या आगमनाचा आनंद, तर दुसऱ्या बाजूला आईच्या निधनाचे दुःख अशा दुहेरी भावनांमध्ये कुटुंबीय अडकले आहेत.
घोडणकप्पीसारख्या दुर्गम भागांमध्ये आजही सर्व हंगामात वापरता येईल असे रस्ते, तत्काळ आरोग्य सेवा आणि सुलभ रुग्णवाहिका सुविधा उपलब्ध नसल्याचे या घटनेतून पुन्हा अधोरेखित झाले आहे. स्थानिक नागरिकांनी प्रशासनाकडे तातडीने रस्त्यांची उभारणी, आरोग्य सुविधांचा विस्तार आणि दुर्गम गावांसाठी विशेष आपत्कालीन यंत्रणा उभारण्याची मागणी केली आहे.
या हृदयद्रावक घटनेमुळे संपूर्ण गाव शोकमग्न झाले असून, दुर्गम भागातील नागरिकांना मूलभूत सुविधा उपलब्ध करून देण्यासाठी प्रशासनाने ठोस पावले उचलण्याची गरज पुन्हा एकदा अधोरेखित झाली आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.