चंद्रपूर : राजुरा तालुक्यातील धोपटाळा येथे ३५ वर्षीय विवाहित महिलेची धारदार शस्त्राने गळा चिरून हत्या करण्यात आल्याच्या प्रकरणाचा चंद्रपूर पोलिसांनी अवघ्या काही तासांत छडा लावला आहे. या खळबळजनक घटनेनंतर जिल्हाभरात एकच चर्चा सुरू झाली होती. मात्र पोलिसांनी तांत्रिक तपास, सायबर विश्लेषण आणि गुप्त माहितीच्या आधारे आरोपीचा माग काढत थेट तेलंगणा राज्यातून त्याला अटक करण्यात यश मिळवले.
२९ मे २०२६ रोजी ही घटना उघडकीस आली. मृत महिला शितल कुंभारे या धोपटाळा येथील त्यांच्या माहेरी राहत होत्या. त्यांच्या प्रकृतीबाबत संशयास्पद माहिती मिळाल्यानंतर पती रणधीर कुंभारे तातडीने तेथे पोहोचले. घराच्या मागील बाजूस असलेल्या खोलीत शितल या रक्ताच्या थारोळ्यात पडलेल्या आढळून आल्या. त्यांच्या गळ्यावर गंभीर वार झाल्याचे दिसून आले आणि त्यांचा मृत्यू झाल्याचे स्पष्ट झाले.
घटनेची माहिती मिळताच राजुरा पोलीस घटनास्थळी दाखल झाले. प्राथमिक तपासात अज्ञात व्यक्तीने धारदार हत्याराने गळ्यावर वार करून खून केल्याचे निष्पन्न झाले. याप्रकरणी राजुरा पोलीस ठाण्यात भारतीय न्याय संहिता (BNS) अंतर्गत गुन्हा दाखल करण्यात आला.
प्रकरणाचे गांभीर्य लक्षात घेऊन वरिष्ठ पोलीस अधिकाऱ्यांनी तपासासाठी विशेष पथके तयार केली. स्थानिक गुन्हे शाखा, सायबर सेल आणि राजुरा पोलिसांनी संयुक्तरीत्या तपास सुरू केला. घटनास्थळावरील पुरावे, मोबाईल लोकेशन, तांत्रिक माहिती आणि गोपनीय सूत्रांकडून मिळालेल्या माहितीद्वारे संशयिताचा माग काढण्यात आला.
तपासादरम्यान आरोपी तेलंगणा राज्यातील मंचेरियल जिल्ह्यातील चेन्नूर परिसरात असल्याची माहिती मिळाल्यानंतर पोलिसांचे विशेष पथक तेथे रवाना झाले. नियोजनबद्ध कारवाई करत पोलिसांनी राजेश व्यंकटी अट्टेटेला (वय ३५) याला ताब्यात घेतले. चौकशीदरम्यान त्याने गुन्ह्यातील सहभाग मान्य केल्याची माहिती सूत्रांनी दिली.
आरोपीला पुढील तपासासाठी राजुरा पोलिसांच्या ताब्यात देण्यात आले असून, खुनामागील नेमके कारण, आरोपी आणि मृत महिलेतील संबंध तसेच गुन्ह्याचे अन्य पैलू उघड करण्यासाठी तपास सुरू आहे.
या प्रकरणात चंद्रपूर पोलिसांनी दाखवलेल्या तत्परतेमुळे गंभीर गुन्ह्याचा अल्पावधीत उलगडा झाला असून, आरोपीला राज्याबाहेरून अटक करण्यात आल्याने पोलिसांच्या कारवाईचे कौतुक होत आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.