चंद्रपूर: जिल्ह्यात एक धक्कादायक घटना उघड झाली असून, एका शिक्षकाने अल्पवयीन विद्यार्थिनीवर दीर्घकाळ अत्याचार केल्याचे समोर आले आहे. पीडित मुलीच्या कुटुंबीयांना याबाबत माहिती मिळताच त्यांनी पोलिसांकडे धाव घेतली आणि तक्रार दाखल केली. शहर पोलिसांनी तत्काळ कारवाई करत आरोपी शिक्षक दिलीप दादाजी मडावी (वय ५३) याला अटक केली आहे.
शिक्षकाचा विश्वासघात, हुशार विद्यार्थिनीला लक्ष्य
माहितीनुसार, पीडित मुलगी राजुरा पोलिस ठाण्याच्या हद्दीतील शाळेत पाच वर्षांपूर्वी सहावीत शिकत होती. त्याच शाळेत आरोपी शिक्षक मडावी कार्यरत होता. विद्यार्थिनी हुशार असल्याने तिचे भविष्य उज्ज्वल होण्यासाठी चांगल्या शैक्षणिक संधींची गरज असल्याचे सांगत शिक्षकाने तिच्या पालकांना तीला चंद्रपूरला पाठवण्याचा सल्ला दिला. त्यावर विश्वास ठेवून पालकांनी मुलीला उच्च शिक्षणासाठी चंद्रपूर येथे पाठवले.
गृहसाहित्याच्या बहाण्याने सुरू झाला अत्याचाराचा काळ
मुलगी चंद्रपूरला आल्यापासून पालक तिच्या आवश्यक वस्तू शिक्षकाकडे पाठवायचे. शिक्षकही त्या वस्तू देण्याच्या नावाखाली मुलीच्या रूमखाली जाऊन तिला आपल्या गाडीत बसवत असे. त्याचवेळी तो तिचे शोषण करीत असल्याचे तपासात स्पष्ट झाले. बदनामीच्या भीतीने मुलीने अनेक दिवस हा प्रकार लपवून ठेवला.
व्हिडिओ व्हायरल करण्याची धमकी; मानसिक छळही वाढला
अत्याचारानंतर आरोपी शिक्षक मुलीला सतत धमक्या देत असे. रात्रीच्या वेळी बाथरूममध्ये जाऊन कपडे काढून व्हिडिओ कॉल करण्यास तो सक्ती करत असे. इतकेच नव्हे तर त्या कॉलचे स्क्रीनशॉट आणि व्हिडिओज सेव्ह करून ठेवत तिच्यावर मानसिक दबाव वाढवत होता.
२० नोव्हेंबर २०२५ रोजी चुकून काही स्क्रीनशॉट आणि चॅटचे भाग मुलीच्या वडिलांच्या फोनवर गेले आणि संपूर्ण प्रकरण उघडकीस आले.
कुटुंबीय हादरले; तात्काळ पोलिसांत धाव
फोनवर आलेले फोटो पाहून कुटुंबीय हादरून गेले. मुलीची विचारपूस केल्यानंतर तिने संपूर्ण सत्य सांगितले. कुटुंबीयांनी तात्काळ शहर पोलिस ठाण्यात तक्रार नोंदवली.
पोलिसांची जलद कारवाई; अनेक गंभीर गुन्हे दाखल
पोलिस निरीक्षक निशिकांत रामटेके यांच्या मार्गदर्शनाखाली पीएसआय तृप्ती खंडाईत यांनी पीडित मुलीचे बयान नोंदवले. आरोपी दिलीप मडावीवर खालील कलमांनुसार गुन्हा दाखल करण्यात आला आहे—
-
बीएनएस कलम ७५(१), ६४(२), आयएमएफ ६५(१), ३५२
-
पॉक्सो कायदा कलम ६६(ई), ६७(ए)
-
आयटी ॲक्ट अंतर्गत गुन्हे
त्यानंतर पोलिसांनी आरोपीला अटक केली असून पुढील तपास सुरू आहे.
कमेंट बॉक्समध्ये कोणत्याही लिंकचा प्रचार करू नका, बातम्यांशी संबंधित कमेंट करा.