नागपूर : ब्रम्हपुरीच्या बफर झोनमध्ये पाच वाघ स्थलांतरित केले जाणार आहे. एनटीसीए ने त्याला मान्यता दिली आहे, अशी माहिती वनमंत्री सुधीर मुनगंटीवार यांनी आज येथे दिली. ते सोमवारी नागपुरात पत्रकारांशी बोलत होते.
ते म्हणाले, दोन वाघांना आपण जेरबंद केले असून तीन बिबट्याला जेरबंद केले. दोन वर्षांचे आकडे बघितल्यास वाघांची ५०० वर पोहचली आहे. त्यासोबतच मानव वन्यजीव संघर्ष देखील वाढला आहे. वन्यप्राण्यांच्या हल्ल्यात जखमी किंवा मृत्यू झालेल्यांच्या कुटुंबीयांना आर्थिक मदत दिली जात असून त्यात वाढ करण्याचा निर्णय घेणार आहोत.
नियंत्रक व महालेखा परीक्षक (कॅग) मार्फत मुंबई महापालिकेत (महाविकास आघाडी सरकारच्या कार्यकाळात) झालेल्या १२ हजार कोटींच्या कामांची चौकशी केली जाणार आहे.
कोणत्याही पुराव्याअभावी, कागदाअभावी गुजरातला प्रकल्प पळवल्याचा आरोप केला जात आहे. त्यासंबंधित एखादा तरी कागद दाखवा की जो प्रकल्प महाराष्ट्रात येणार होता आणि तो गुजरातला गेला. कुठलेही तथ्य नसताना आरोप केले जात आहेत, म्हणून श्वेतपत्रिका काढण्याची मागणी केली. महाराष्ट्राच्या हक्काचे प्रकल्प गुजरातला जात नाही, असे मुनगंटीवार यांनी स्पष्ट केले.
