प्रतिनिधी / भंडारा : शाळेच्या मैदानावर वीज कोसळून दोन विद्यार्थिनी किरकोळ जखमी झाल्याची घटना लाखांदूर तालुक्यातील सोनी येथील लोकमान्य विद्यालयात मंगळवारी (दि. १९) दुपारी २ वाजेच्या सुमारास घडली. दोन्ही विद्यार्थिनींवर लाखांदूरच्या ग्रामीण रुग्णालयात उपचार सुरू आहेत.
वैष्णवी अरविंद वावरे (१५, रा. मेंढा) आणि आचल तेजराम वाघधरे (१५, रा. इंदोरा, ता. लाखांदूर) अशी जखमी विद्यार्थिनींची नावे आहेत. मंगळवारी दुपारची सुटी झाल्याने विद्यार्थी वर्गाबाहेर आले होते. वैष्णवी आणि आचल मैदानाकडून वर्गखोलीकडे परत जात असताना अचानक वीज कडाडली आणि शाळेच्या मैदानावर कोसळली.त्यात या दोन्ही विद्यार्थिनी खाली कोसळून किरकोळ जखमी झाल्या.
या दोघींनाही शिक्षकांनी तत्काळ लाखांदूर ग्रामीण रुग्णालयात उपचारासाठी दाखल केले. दोन्ही विद्यार्थिनींची प्रकृती स्थिर असल्याची माहिती आरोग्य अधिकाऱ्यांनी दिली. या घटनेची माहिती लाखांदूर येथील पोलिसांसह महसूल विभागाला देण्यात आली आहे. या घटनेची माहिती मिळताच लाखांदूरचे गटशिक्षणाधिकारी तत्त्वराज अंबादे यांनी ग्रामीण रुग्णालयात जाऊन विद्यार्थिनींच्या प्रकृतीची विचारपूस केली.
