चंद्रपूर : चंद्रपूर जिल्ह्यात काँग्रेसची सरशी झालेली आहे. चंद्रपुर जिल्ह्यातील सहा नगरपंचायतीचे निकाल हाती आले आहेत. या निकालात काँग्रेसला खूप मोठे यश प्राप्त झाल्याने काँग्रेसमध्ये आनंदाची लाट पसरली आहे. तीन नगरपंचायतींवर काँग्रेसने बहुमत प्राप्त केले आहे. तर, दोन नगरपंचायतींमध्ये काँग्रेस पहिल्या क्रमांकाचा पक्ष ठरला आहे. भाजपाला येथे हताश व्हावे लागले आहे. तब्बल पाच नगरपंचायतींमध्ये भाजपा पिछाडीवर गेली आहे .फक्त, पोंभुर्णा नगरपंचायतीवर भाजपने आपले बहुमत प्राप्त केले आहे.
चंद्रपुर जिल्ह्यातील पोंभुर्णा हे माजी अर्थमंत्री तथा आमदार सुधीर मुनगंटीवार यांचे कार्यक्षेत्र आहे. मुनगंटीवारांनी तालुक्यात अनेक विकासकामे केली. त्यामुळे, मुनगंटीवारांच्या कार्यावर पोंभुर्णा शहरवासीयांनी परत एकदा विश्वास टाकला. पोंभुर्णाचा निकालाकडे सर्व जिल्हाचे लक्ष लागले होते. अपेक्षेप्रमाणेच भाजपाला येथे बहुमत मिळले आहे. १७ पैकी १० जागेवर भाजपच्या उमेदवारने विजय मिळविला आहे. तर, शिवसेनेने ४ जागी विजय मिळविला आहे . काँग्रेसला येथे केवळ एका जागेवर समाधान मानावे लागले.
जिल्ह्यातील ६ नगरपंचायतींमध्ये एकूण १०२ जागांसाठी लढत होती. काँग्रेसने येथे मोठा विजय प्राप्त करत ५३ जागी आपली सत्ता मिळविली आहे. भाजपला येथे २४ जागेवर विजय मिळाला आहे. शिवसेनेला केवळ ६ जागांवर समाधान मानावे लागले आहे. तर, राष्ट्रवादीने ८ जगासोबत समाधान मानले आहे. तर, इतर (अपक्ष) उमेदवारांनी ११ जागा मिळविल्या आहे.
चंद्रपूर जिल्ह्यात काँग्रेस-भाजपमध्ये काट्याची टक्कर होण्याची शक्यता वर्तविली होती. काँग्रेसचे बडे नेते मंत्री विजय वडेट्टीवार, खासदार धानोरकर, आमदार सुभाष धोटे यांनी प्रचाराची धूम ठोकली होती. तसेच, भाजपाचे नेते सुधीर मुनगंटीवार यांनी अनेक सभा गाजविल्या. वडेट्टीवार यांचे कार्यक्षेत्र असलेल्या सावली येथे काँग्रेसने तब्बल १४ जागा जिंकल्या आहेत. भाजपाला येथे तीन जागांवर समाधान मानावे लागले. सिंदेवाही-लोनवाही नगरपंचायतींमध्ये काँग्रेसने १३ जागा जिंकल्या तर, भाजप तीन जागांवर विजय मिळवू शकला आहे.