Delhi News: देशाची राजधानी दिल्ली गुन्हेगारी, विशेषतः महिलांवरील हिंसाचारासाठी सर्वात असुरक्षित आहे. नॅशनल क्राईम रेकॉर्ड ब्युरो (NCRB) ने जारी केलेल्या वार्षिक गुन्हे अहवालानुसार, दिल्ली हे महिलांसाठी देशातील सर्वात धोकादायक महानगर आहे. एनसीआरबीच्या अहवालानुसार देशाच्या राजधानीत दररोज 3 बलात्काराचे गुन्हे नोंदवले जातात. NCRB द्वारे 3 डिसेंबर 2023 रोजी जारी करण्यात आलेल्या भारतातील गुन्हेगारी अहवालावरून हे स्पष्ट झाले आहे की 2022 मध्ये शहर परिसरात महिलांवरील 14,158 गुन्ह्यांच्या घटनांची नोंद झाली आहे, जी सलग तिसऱ्या वर्षी 19 महानगरांमध्ये सर्वाधिक आहे. प्रत्येक एक लाख महिलांविरुद्ध सुमारे 186.9 गुन्हे नोंदवले गेले. एनसीआरबीच्या आकडेवारीनुसार, यात बलात्काराच्या 1,204 प्रकरणांचा समावेश आहे.
नातेवाइकांनी केलेल्या अत्याचाराची 4847 प्रकरणे समोर आली
देशाची राजधानी दिल्लीत महिलांच्या अपहरणाच्या 3,909 घटनांची नोंद झाली आहे. शहरात हुंडाबळी प्रकरणी एकूण 129 गुन्ह्यांची नोंद झाली आहे. दिल्लीत पती किंवा त्यांच्या नातेवाईकांकडून क्रूरतेच्या 4,847 घटनांची नोंद झाली आहे. एनसीआरबीच्या वार्षिक अहवालानुसार, दिल्ली हे महिलांसाठी देशातील सर्वात असुरक्षित महानगर आहे, जिथे दररोज सरासरी तीन बलात्काराच्या घटना नोंदवल्या जातात.
अशा घटना रोखणे कठीण आहे
मीडिया रिपोर्ट्सनुसार, दिल्ली पोलिसांच्या एका वरिष्ठ पोलिस अधिकाऱ्याच्या म्हणण्यानुसार, बलात्कार आणि मारहाणीच्या बहुतेक घटनांमध्ये पीडित आणि आरोपी सहसा एकमेकांना ओळखतात. अशा घटना रोखणे पोलिसांना थेट अवघड जाते, कारण पीडित महिला तक्रार देण्याचे टाळतात.
सरासरी गुन्ह्यांमध्ये वाढ
एनसीआरबीच्या ताज्या आकडेवारीनुसार, शहरात मुलांविरोधातील 7,400 गुन्ह्यांची नोंद झाली असून त्यात 22 खुनाच्या घटनांचा समावेश आहे.
2021 मधील 1,166 प्रकरणांवरून ज्येष्ठ नागरिकांवरील (60 वर्षे आणि त्यावरील) गुन्ह्यांच्या घटनांमध्ये वाढ होऊन 2022 मध्ये 1,313 प्रकरणे झाली. 2022 मध्ये शहरातील सायबर गुन्ह्यांमध्ये दुपटीने वाढ झाली आहे. ही संख्या 2021 मधील 345 प्रकरणांवरून 2022 मध्ये 685 प्रकरणांवर पोहोचली. शहरात एकूण 501 खुनाच्या घटनांची नोंद झाली आहे. यामध्ये मानवी तस्करीचे 106 गुन्हेही दाखल झाले आहेत. 2022 मध्ये दिल्लीत 113 मुलींच्या तुलनेत किमान 492 अल्पवयीन मुलांची तस्करी झाल्याचे अहवालात म्हटले आहे.